कांग्रेसमा तेस्रो धारको जन्म

६ भाद्र, काठमाण्डौ । कार्यवाहक सभापति सुशील कोइराला र वरिष्ठ नेता शेरबहादुर देउवाबीच पार्टी नेतृत्व लिने होडबाजी चलिरहेका बेला नेपाली कांग्रेसभित्र औपचारिक रुपमै तेस्रो धारको जन्म भएको छ ।कार्यवाहक सभापति कोइराला र वरिष्ठ नेता देउवाबीच महाधिवेसनमा सभापतिका लागि कडा प्रतिष्पर्धा हुने अनुमान भइरहेका बेला नेता भिमवहादुर तामाङले आइतबार सभापतिमा र नरहरि आचार्यले महामन्त्रीमा उम्मेदवारी दिने घोषणा गर्नुभएपछि कांग्रेसमा तेस्रो धारको जन्म भएको हो ।

पार्टी कार्यालय सानेपामा पत्रकार सम्मेलनको आयोजना गरेर नेता तामाङ र आचार्यले पार्टी दुई धारमा विभाजित भएकाले पार्टीलाई वैचारिक रुपमै एकतावद्ध गर्न उम्मेदवारी दिएको बताएका छन् ।सत्ताको होडबाजीले पार्टीविचार शून्य हुँदै गएको र एकीकरणपछि चरम गुठबन्दी देखिएकाले नेपाली कांग्रेसलाई विचार प्रधान बनाउनका लागि आफूहरुले उम्मेदवारी दिएको उनीहरुले दावी गरेका छन् ।

मुल्य र मान्यतालाई सिद्धान्तमा मात्र हैन व्यवहारमा देखाउन आफूहरुले उम्मेदवारी दिएको तामाङ समूहको भनाई छ ।तामाङको उम्मेदवारी घोषणासँगै आगामी १२ औं महाधिवेसनमा कोइराला, देउवा र तामाङबीच त्रिपक्षीय भिडन्त हुने लगभग पक्का देखिएको छ । तामाङको उम्मेदवारीले कांग्रेसभित्रको चुनावी समिकरणलाई जटिल बन्ने देखिन्छ ।

कोइराला र देउवा समूहमा बौद्धिक पहिचान बनाएका नेताहरुले समेत तामाङ समूहलाई साथ दिएका छन् । कांग्रेसको १२ औं महाधिवेसन आगामी असोज पहिलो साता राजधानीमा हुँदैछ ।