चितवन फागुन १३- सामुदायिक वनका कर्मचारीले एसएलसीको तयारीमा रहेका दुई विद्याथीलाई खुकुरी प्रहार गरी घाइते बनाएका छन्। काठको विषयमा विवाद भैरहेका बेला अकस्मात पुगेका दुई विद्यार्थीमाथि नै उनीहरुले आक्रमण गरेका थिए। घटनामा संलग्न ४ जनालाई प्रहरीले पक्राउ गरेको छ। घाइते हुनेमा पदमपुर-८ का २१ वर्षीय गोविन्द चौधरी र १७ वर्षका सन्तु चौधरी छन्। ट्युसन पढेर घर फर्कने क्रममा बुधबार साँझ उनीहरुमाथि खुकुरी प्रहार भएको गोविन्दका बुबा हरिकृष्ण चौधरीले बताए।
झगडा छुट्टयाउन गएका बेला आफूलाई पनि कुटपिट गरेको चौधरीले नागरिकलाई बताए।
गम्भीर घाइते गोविन्द चौधरीको चितवनमा उपचार हुन नसकेपछि काठमाडौं पठाइएको छ। सन्तुको भने भरतपुर मेडिकल कलेजमा उपचार भैरहेको छ। सो घटनामा संलग्न रहेका स्थानीय तेजबहादुर लोप्चन हतियारसहित पक्राउ परेका छन्। अन्य पक्राउ पर्नेमा स्थानीय अमित गुरुङ, लक्ष्मण थापा, ढाकाराम दाहाल छन्।विद्यार्थीलाई खुकुरी प्रहार गर्नेहरु स्थानीय थाङखोला सामुदायिक वनका पदाधिकारी छन्। घटनाबारे थप अनुसन्धान भैरहेको चितवनका प्रहरी निरीक्षक राजीव बस्नेतले जानकारी दिए।
नागरिक
Comments :
0 comments to “एसएलसीको तयारीमा रहेका विद्यार्थीमाथि खुकुरी प्रहार”
Post a Comment