देवयानी अब कोरियामा

नेपाली चलचित्र ‘देवयानी’ प्रिमियर सो दक्षिण कोरियाबाट गरिने भएको छ । नेपाली नयाँ वर्षको अवशर पारेर नेपाल योङ्ग स्टार ग्रुप र काभ्रे सम्पर्क समिति दक्षिण कोरियाको सयूक्त आयोजनामा अप्रिल १० मा राजधानी सउलमा प्रिमियम शो गर्न लागिएको हो । निर्माता तथा निर्देशक विजय बस्नेतका अनुसार उनको यो महत्वाकाङ्क्षी चलचित्र हो । दुई वर्ष तिन महिना लगाएर पटकथा तयार पारिएको यस चलचित्रको विचार, प्रविधि र कलाका हिसाबले अन्तर्राष्ट्रिय स्तरको भन्न रहेको बस्नेतले बताए ।‘देवयानी’ नारीवाद, राष्ट्रियता र उदात्त प्रेमको त्रिवेणी रहेको यो चलचित्र पितृसत्तात्मक समाजमा हुर्किएकी नेपालकी आधुनिक युवतीका स्वप्नील आकाङ्क्षाहरुको कथा हो । यसले देशको माटो र आत्मसम्मानलाई गौरवका साथ प्रस्तुत गरेको छ । यस चलचित्रले व्यक्ति प्रेम जति महान् छ त्यसभन्दा पनि उदात्त र गहिरो प्रेमका रुपमा देश प्रेमलाई चिनाउने प्रयास गरेको छ । जहाँसुकै बस्ने नेपाली मन अन्ततः नेपाली हो र यस चलचित्रमा उसले परिवर्तन हुँदै गरेको नेपाली समाजको सुन्दर चित्र देख्न पाउने छ ।

चलचित्रमा निखिल उप्रेती, दिलिप रायमाझी, बिमला केसी, अनिल पाण्डे र तृप्ति नाडकरको अभिनय रहेको छ ।

कृष्णहरि बरालको गीत र लक्ष्मण शेषको सङ्गीत रहेको यस चलचित्रमा नृत्य निर्देशन वसन्त श्रेष्ठले गरेका छन् भने वरिष्ठ छायाँकार राजु थापाले यसको छायाङ्कन गरेका छन् । रोसन श्रेष्ठको द्वन्द्व निर्देशन रहेको यस चलचित्रका कति दृश्यहरु त एनिमेसन समेत गरिएका छन् । नायिका विमला केसीको कथामा आधारित भएर पटकथा लेख्ने काम निर्देशक स्वयम्ले गरेका छन् ।