पर्वत महोत्सवमा २० प्रतिशत स्टल खालि

धौलागिरी अञ्चलको पर्यटन, लघु उद्यम र व्यापारलाई प्रवर्द्धन गर्ने उद्देश्यले आयोजित तेस्रो पर्वत महोत्सवम राखिएका २० प्रतिशत स्टल खाली रहेका छन् ।महोत्सवमा निर्माण गरीएका कुल १ सय २५ मध्ये २५ वटा स्टल खाली रहेका हुन । शुरुमा विभिन्न क्षेत्रका व्यावासायी, उद्यमी तथा कृषकले आ-आफ्ना बस्तु तथा सामान विक्रिका लागि बुकिङ्ग गरेपनि पछि नआएका हुन् । उत्पादक, कृषक तथा व्यावसायीहरुले न्युनतम तीन हजारदेखि १५ हजारसम्ममा स्टल बुक गराएका हुन् । खाली रहेका स्टलहरु बुक गर्ने संस्था वा व्यावसायीले पनि अग्रिम भुक्तानी दिइसकेको तर सामानहरु किन नराखेको भन्ने जानाकारी प्राप्त नभएको महोत्सवका मुख्य संयोजक होमनारायण श्रेष्ठले बताए ।

पर्वत पर््रवर्द्धन हाम्रो दायित्व’ भन्ने मुल नाराका साथ संचालन भएको महोत्सवमा धेरै ग्रामीण उत्पादनका सामाग्रीहरु रहेका छन् । महोत्सवमा २ करोड बराबरको आर्थिक कारोबार गर्ने लक्ष्य रहेको छ । एक लाख दर्शक तथा पर्यटकलाई भित्र्याउने लक्ष्य रहेको छ । महोत्सवलाई नेपाल बैंक लिमिटेड र जिल्ला विकास समिति पर्वत, राष्ट्रिय बाणिज्य बैंक लगायतका संघ संस्थाहरुले प्रायोजन गरेका छन् । २२ गतेसम्म संचालन हुने महोत्सवको दोस्रो दिन सम्म २५ हजार भन्दा बढिले अबलोकन गरेको आयोजकले जनाएको छ ।

स्थानीय उत्पादन, लघु उद्यम र व्यापारमेला, होटल तथा अटो मोवायल, सुचना प्रविधि, कृषि, वित्तिय संस्था, शैक्षिक पर््रदर्शनी लगायतका छन् । धौलागिरी अञ्चलका गाउँ गाउँमा उत्पादन भएका सामग्रीहरु, स्थानीय अल्लोका कपडा, लोक्ताको नेपाली कागज, हस्ताकलाका सामाग्रीहरु, सुन्तलाको जुस, मह, जडिबुटी, लगायतको समेत पर््रवर्द्धन गरिएको हो । त्यस्तै लप्सीफुड, अदुवा क्याण्डी, लालीगुँरासको जुस, काफलको जुस, मौरीघार, विभिन्न कृषि बाली, र गाउँ गाउँमा उत्पादीत जिल्लाको पहिचान दिलाउने खालका वस्तुलाई स्टलमा राखिएको छ ।

त्यस्तै भलिबल, लोक दोहोरी, धौलागिरी अञ्चल स्तरीय नृत्य प्रतियोगिता र छेलो प्रतियोगिता लगायत रमाईलो मेलाका कार्यक्रमहरु समेत छन् । त्यस्तै चर्चित लोक गायिका कोमल वली, पुरुषोत्तम न्यौपाने लगायत स्थानीय तथा विभिन्न हास्य कलाकारहरुको प्रस्तुती रहेको छ । बुक गराएका व्यावसायिहरु नआएपनि आर्थिक कारोबारमा फरक नपर्ने बताइएको छ ।