मलाई थाहा छ, बेहुलीको भेषमा म निकै राम्री देखिन्छु । सबैले 'कस्ती राम्री देखिएकी,' भनेर जिस्क्याउँछन् पनि । त्यसैले लगाउन मन नलागेको । मलाई भेट्ने सबैले विवाहबारे सोध्छन्, 'बिहे कहिले गर्ने ?' उनीहरूलाई जवाफ दिँदा-दिँदा म थाकिसकेँ । यो लुगामा देखिएपछि मैले अनेकखाले प्रतिक्रिया बेहोर्नुपर्छ ।
योभन्दा पहिले बेहुलीको लुगा लगाउनुभएको थियो ? यो लुगामा राम्री देखिन्छु भनेर कसरी थाहा पाउनुभयो ?
दुलहीको लुगामा सबै नारी राम्री देखिन्छिन् । यसभन्दा पहिले म्युजिक भिडियो सुटिङका वेला मैले यो लुगा लगाएकी थिएँ । पछि, त्यो भिडियो हेरेर म आफँै दंग परेकी थिएँ । एउटा रमाइलो कुरा, त्यस भिडियोमा म दुलही बनेको देख्दा मेरा आफन्त र साथीहरू रोएका थिए रे । मलाई माया गर्ने साथीहरू मेरो यो फोटो देखेर फेरि रुनेछन् ।
आज बिहेको यो लुगा लगाउँदा कस्तो लाग्यो ?
रमाइलो । एकपछि अर्को पहिरन लगाउँदै, शृंगार गर्दै जाँदा आज म साँच्चिकै दुलही बन्दै छु कि जस्तो अनुभूति भइरहेको छ । मेरो मुटु नै ढक्क फुलेजस्तो, कता-कता डर लागेजस्तो भएको छ । म त साँच्चिकै दुलही बनेर बिहे गरेर कतै जाँदै छु कि जस्तो अनुभव हुँदै छ ।
यो लुगामा मन परेको कुरा (जस्तो चुरा, सिन्दूर, साडी) के हो ?
सबै लुगा र शृंगारका साधन मन परेको छ । किनभने बेहुली हुन सबैको उत्तिकै महत्त्व छ । यी पहिरन मैले निकैपटक लगाएकी छु ।
स्कुलदेखिको मेरी साथी थिइन् तुलसीपुरमा, उनी मेरो बेस्टप|mेन्ड । उनको बिहेमा उनलाई शृंगारमा सघाएकी थिएँ । उनी दुलही बनेको देख्दा मलाई पनि दुलही बन्न मन लागेको थियो । तर, मेरो उद्देश्य अर्कै थियो । फेरि मेरो दिमागमा त्यस कुराले त्यति महत्त्व पाएन । अहिले सम्झँदा लाग्छ- त्यो मेरो 'इम्याचियोरिटी' थियो ।
बिहे गरेको भए तपाईंको लक्ष्य पूरा हुँदैनथ्यो त ?
हुन पनि सक्थ्यो । तर, हाम्रो समाज र मेरो पारिवारिक बनावटका कारण मेरो उद्देश्य पूरा नहुने सम्भावना निकै थियो ।
बिहेमा यस्तो पहिरन नै किन लगाइन्छ ? यो आवश्यक नै छ र ?
किनभने हिन्दूधर्म परम्पराअनुसार हरेक धार्मिक अनुष्ठानमा रातोलाई शुभ मानिन्छ । त्यसैले सबै शुभकार्यमा रातो रंग प्रयोग गरिने चलन निकै अघिदेखि छ । बिहे त झन् दुई आत्मालाई एक बनाउने शुभकार्य हो । विजयको प्रतीक पनि हो रातो रंग, प्रेमको प्रतीक पनि । रातो रंगले मानिसलाई ऊर्जा पनि दिन्छ ।
तपाइंले जीवनभरि नै यस्तो पहिरन लगाउने वेला भयो नि ? किन नलगाएको ? ढिला भएन ?
आज लगाएकी छु नि । यतिले पुगेन र ? लगाउँला नि । त्यो दिन पनि छिट्टै आउनेछ । ढिला भएको छ कि छैन त्यो त मान्छेको हेराइमा फरक पर्छ ।
तपाइंले आजसम्म कोही आदर्श दुलही देख्नुभएको छ ?
आदर्श केलाई मान्ने ? मान्छे कुनै कुरामा पूर्ण हुन सक्दैन । तपाइंले पूर्ण देख्नुभएको मान्छे अर्कोलाई अपूर्ण लाग्न सक्छ । त्यसैले होला, मैले त्यस्तो आदर्श दुलही अहिलेसम्म देखेकै छैन ।
तपाइंलाई आएको बिहेका प्रस्ताव कस्ता थिए ? कस्तो लाग्यो ?
सामान्य, जस्तो अरूलाई पनि आउँछन् । एउटा प्रस्ताव मलाई याद छ, पहिलोपटक एउटा केटा मलाई हेर्न आएका रहेछन् । मामुले मलाई बैठकमा बोलाउनुभयो, म हातमा लठ्ठी हल्लाउँदै भित्र पसेँ र आमालाई ग्वाम्म अँगालो हालेँ । टेबुलमा रोटी थियो झिकेर खाइदिएँ । हाँसेर गफ पनि गरेँ । उनीहरू त मलाई देखेर छक्क परे । त्यसवेला केटा निकै नर्भस भएका थिए । साँझ आमाले मलाई सोध्नुभयो, 'त्यो केटा कस्तो लाग्यो ?' भनेर । मैले सोझै भनेँ, 'म बिहे गर्दिनँ । अहिले नै त्यस्तो कुरा नगर्नूस् ।' त्यसपछि मेरो जीवनले अर्कै मोड लियो ।
त्यसपछि बिहेका कस्ता-कस्ता प्रस्ताव आए ? किन अस्वीकार गर्नुभयो ?
त्यसपछि अनगिन्ती आए । सबै क्षेत्रका केटा आएका थिए । म हाँसिदिन्थे, कुरा गरिदिन्थेँ । तर, प्रेमी बनाउँदै हिँडिनँ किनभने मेरो सानो निर्णयले पनि मेरो लक्ष्यमा पुग्न अवरोध हुन सक्थ्यो ।
हिजोआजका दुलही कस्ती हुनुपर्छ ?
सक्षम । किनभने भोलि ऊ नयाँ सन्ततिको आमा बन्नेछ । अर्का कुरा, उसले परिवार र प्रेमलाई सन्तुलित राख्न पनि सक्ने हुनुपर्छ ।
तपाइंले प्रेम गर्नुभएको छ ?
गर्या छु । मैले जसलाई प्रेम गर्छु, अति नै गर्छु । र, उसलाई सम्मान पनि गर्छु ।
प्रेमीको सामीप्यमा बस्दा कस्तो कुरा गर्नुहन्छ ?
सामीप्यमा त बसिँदैन । बसियो भने पनि बौद्धिकस्तरको कुरा हुन्छ । देश र राजनीतिको कुरा हुन्छ । अलिअलि मायाको कुरा त हुने नै भयो ।
सुहागरात सम्झनायोग्य बनाउन के गर्नुपर्ला ?
मेरो विचारमा त सुहागरातका लागि बेडमा सिस्नो राखिदिनुपर्छ । जब दुलाहालाई सिस्नोले पोल्छ, त्यो रात जीवनभरि नै अविस्मरणीय बन्नेछ ।
सुहागरात कस्तो होस् भन्ने चाहनुहुन्छ ?
आकर्षणपूर्ण । सुखद्, अविस्मरणीय होस् भन्ने चाहन्छु । मेरो मात्रै होइन सबैको चाहना त्यस्तै हुन्छ ।
सुहागरातका लागि कुन स्थान बढी उपयुक्त होला ?
स्थानले खासै फरक पार्दैन । दुवैबीच अगाध माया र आकर्षण छ भने सुनसान जंगल या झुपडीमा पनि सुहागरात सुखद् हुन सक्छ । दुवैबीच आत्मीय प्रेम छैन भने जस्तो ठाउँमा गए पनि त्यसले केही महत्त्व राख्दैन ।
बिहेका पाँच फाइदा र बेफाइदा ?
फाइदाः
१. सुख-दुःख साटासाट गर्न पाइन्छ ।
२. नयाँ सृष्टि सुरु हुन्छ अर्थात् सन्तानको जन्म हुन्छ ।
३. प्रगतिका लागि आवश्यक सहयोग प्राप्त हुन्छ ।
४. अनुशासित समाज निर्माण हुन्छ ।
५. विवाहले यौनलाई अनुशासित बनाइदिन्छ ।
बेफाइदाः
१. पारिवारिक झन्झट ।
२. बिहे असफल भएमा भोग्नुपर्ने पीडा दुःखदायी हुन जान्छ ।
३. अनावश्यक रूपमा जनसंख्या वृद्धि हुन्छ ।
४. समझदारी नभएमा प्रगतिमा बाधा हुन्छ ।
५. अनावश्यक रूपमा नारीको स्वतन्त्रतामाथि हनन हुन सक्छ ।
अनलाइन बाट
Comments :
0 comments to “हेर्नुस त कोमल वली त दुलईको भेषमा चिरीच्याट्ट पर्नु भएछ नि”
Post a Comment