आइलाग्नेमाथि जाइलाग्न राप्रपाद्वारा युथ भोलेन्टियर्स गठन

भक्तपुर, भदौ ५- पशुपतिशमशेर अध्यक्ष रहेको राप्रपाले युवा सङ्गठन युथ भोलेन्टियर्स गठन गरेको छ। आइलागेमा जाइलाग्ने र पार्टीको सुरक्षा कवचका रुपमा यो सङ्गठनले काम गर्ने जानकारी राप्रपाका नेता तथा पूर्व मन्त्री बुद्धिमान तामाङले दिएका छन्।

भोलेन्टियर्सको भक्तपुर समिति गठनका क्रममा तामाङले भने- यो सङ्गठन विधिको शासनमा विश्वास गर्छ। विशुद्ध सामाजिक काममा संलग्न रहन्छ । तर कसैले पार्टीमाथि आइलागेमा भने जाइ पनि लाग्छ।

उनले १५ दिनभित्र यो सङ्गठनलाई देशव्यापी बनाइने जानकारी पनि दिए।

भोलेन्टियर्सको भक्तपुर अध्यक्षमा राजेन्द्र लाखा रहेका छन्। उनको अध्यक्षतामा अहिले ७ सदस्यीय समिति गठन गरिएको छ।
- रोशन शिल्पकार