प्रधानमन्त्रीको टुंगो लागेन, अर्को निर्वाचन शुक्रबार

व्यवस्थापिका संसदमा प्रधानमन्त्रीका लागि भएको निर्वाचनमा एकीकृत नेकपा माओवादी र नेपाली कांग्रेसले स्पष्ट बहुमत हासिल गर्न नसके पछि बुधबार प्रधानमन्त्रीको टुंगो लाग्न सकेन । एमालेले भने अन्तिम समयमा आएर आफ्नो उम्मेदवारी फिर्ता लिएको छ ।प्रधानमन्त्रीका प्रत्यासीहरुले स्पष्ट बहुमत हासिल गर्न नसकेपछि आगामी शुक्रबार दिउँसो १ बजे बस्ने संसदको अर्को बैठकले नयाँ प्रधानमन्त्रीको टुंगो लगाउने छ ।

संसदमा मतविजनका आधारमा गरिएको निर्वाचनमा माओवादीका अध्यक्ष प्रचण्ड र कांग्रेस संसदीय दलका नेता रामचन्द्र पौडेलले स्पष्ट बहुमत प्राप्त गर्न सक्नु भएन ।दुई तिहाई बहुमत हासिल गर्न नसक्ने अवस्था आएपछि एमालेले भने आफ्नो उम्मेदवारी फिर्ता लिएको थियो ।संसदमा उपस्थित ५ सय ९७ सभासद मध्ये माओवादी अध्यक्ष प्रचण्डको पक्षमा २ सय ४२ र विपक्षमा १ सय १४ मत परेको थियो ।

तटस्थ सभासदको संख्या भने २ सय ३६ जना थिए ।

अध्यक्ष प्रचण्डलाई प्रधानमन्त्रीका उम्मेदवारीका लागि उपाध्यक्ष डा. बाबुराम भट्राईले प्रस्ताव गर्नु भएको थियो भने अर्का उपाध्यक्ष नारायणकाजी श्रेष्ठ प्रकाशले समर्थन जनाएनुभएको थियो ।

यस्तै संसदमा उपस्थित ५ सय ९७ सभासद मध्ये कांग्रेस नेता पौडेलको पक्षमा १ सय २४ र विपक्षमा २ सय ३५ मत परेको थियो । पौडेलको पक्षमा मतविभाजन हुने क्रममा २ सय २८ जना सभासद भने तटस्थ बसेका थिए ।पौडेलको प्रस्तावकमा भने वरिष्ठ नेता शेरबहादुर देउवा रहनुभएको थियो भने समर्थकमा महामन्त्रीद्धय कुलबहादुर गुरुङ र विमलेन्द्र निधि रहनुभएको थियो ।प्रधानमन्त्रीका प्रत्यासी एमालेका अध्यक्ष झलनाथ खनालको पक्षमा ४ सय १ मत प्राप्त हुने लिखित सहमति नआए उम्मेदवारी फिर्ता लिने सर्त अनुसार नै आफ्नो पार्टीले उम्मेदवारी फिर्ता लिएको घोषणा खनालका प्रस्तावक वरिष्ठ नेता माधवकुमार नेपालले गर्नुभएको हो ।

कामचलाउ सरकारका प्रधानमन्त्री समेत रहेका नेपालले आफ्नो पार्टी सहमतिको पक्षमा रहेकाले सहमतिको वातावरण बनाउन उम्मेदवारी फिर्ता लिएको घोषणा गर्नुभएको थियो ।

अन्तरिम संविधानको प्रावधान अनुसार प्रधानमन्त्रीमा चयन हुन हाल कायम ५ सय ९९ सभासदको बहुमत अर्थात ३ सय मतको आवश्यकता पर्छ ।