माओवादी बैठकमा शिर्ष ३ नेताको आ-आफ्नै प्रतिबेदन प्रस्तुत

९ भाद्र, काठमाडौं । एकीकृत नेकपा माओवादी केन्द्रीय कमिटिको बैठकमा अध्यक्ष प्रचण्डले पेश गरेको राजनीतिक प्रतिवेदन मध्यमार्गी भएको भन्दै उपाध्यक्षद्वय मोहन बैद्य र डा. बाबुराम भट्टराइले पनि छुट्टा-छुढ्टै राजनीतिक प्रतिवेदन पेश गर्नुभएको छ ।बैठकमा अध्यक्ष पुष्पकमल दाहाल ‘प्रचण्ड’ले प्रधानमन्त्रीको निर्बाचनमा बहुमत पुग्न नसकेको अवस्था, अवरुद्ध शान्तिप्रक्रिया र संविधान लेखन तथा बढ्दो बैदेशिक हस्तक्षेपलगायत विषय समेटिएको राजनीतिक प्रतिवेदन पेस गर्नुभएको छ ।पोलिटव्युरो सदस्य अग्नी सापकोटाका अनुसार यसअघिको पोलिटव्युरो बैठकले पारित गरेको दस्तावेज थप व्याख्या सहित बैठकमा प्रस्तुत गरिएको छ । प्रचण्डले सापकोटाको सहयोगमा काभ्रेको धुलीखेलस्थित मिराबेल होटेलमा बसेर केन्द्रीय समिति बैठकमा पेश गर्ने दस्तावेज तयार पार्नुभएको थियो ।

अध्यक्षले छलफलका लागि पेश गर्नुभएको राजनीतिक प्रतिवेदनमा पार्टीले अगाडि बढाईरहेको क्रान्तिलाई सडक, सदन र सरकारका माध्यमबाट अघि बढाउनु पर्ने प्रस्ताब गरिएको छ भने उपाध्यक्ष बैद्यको प्रतिवेदनमा पार्टीले अगाडि बढाएको क्रान्तिलाई सफल बनाउन जनविद्रोहमा जानु पर्ने प्रस्ताब गरिएको छ । यस्तै डा. बाबुराम भट्टराईले पार्टी सुदृढिकरणका विभिन्न प्रस्ताव समेटिएको प्रतिवेदन पेश गर्नुभएको छ ।

समसामयीक राजनीतिक परिस्थितिको समिक्षा गर्दै नयाँ रणनीति तय गर्न एकीकृत नेकपा माओवादी केन्द्रीय समितिको बैठक बुधबारदेखि राजधानीमा सुरु भएको हो ।

काठमाडौंको कोटेश्वरस्थित पार्टी केन्द्रीय कार्यालय पेरिसडाँडामा बुधबारबाट सुरु भएको बैठकमा तीनै नेताको प्रतिवेदनमाथि छलफलसहित अग्रगामी यात्राको कार्यदिशा तय गर्ने माओवादीले बताएको छ । बैठक विहीबार ११ बजेसम्मका लागि स्थगित भएको छ ।