'डेमोक्रेसी भिडियो' विजेताको फिल्मी सपना

'प्रजातन्त्र भनेको के हो?' २० वर्षे नेपाली युवाले यसको परिभाषा खोज्ने बिँडो उठाउँदा धेरैले 'दुस्साहसी कदम' भन्दै खिसी गरे। तैपनि उनको मिहिनेत र सिर्जनशीलताले रङ देखायो। र, श्रव्यदृश्यका माध्यमबाट प्रजातन्त्रलाई परिभाषित गर्ने उनको प्रयास विश्वचर्चित बन्यो। एक मिनेट २० सेकेन्डको 'डेमोक्रेसी इज ब्ल्याक' नामक वृत्तचित्रले ८९ मुलुकका २ हजार २ सय प्रतियोगीलाई उछिन्दै अमेरिकी दूतावासको 'डेमोक्रेसी भिडियो प्रतियोगिता' मा पहिलो पुरस्कार हात पार्‍यो। यी युवा फिल्म निर्देशक हुन् - अनुप पौडेल। विज्ञानमा 'प्लस टु' गरेपछि राजधानीको अस्कर कलेजमा फिल्म निर्देशन पढ्दैछन्।'यो दुई वर्षअघिको कन्सेप्ट हो,' कलेजसँगैको चियापसलमा साथीहरूबीच घेरिएका अनुप भन्छन्, 'प्राविधिक ज्ञान नभएकाले पोहोरको प्रतियोगितामा भाग लिन सकिनँ।' फिल्म निर्माणको सामान्य जानकारी पाउनेबित्तिकै उनी गोल्डन गेट कलेजको साइन्स ल्याबमा गएछन्, र सुटिङ थालेछन्।

अफगानिस्तानमा डेढसय भन्दा बढी नेपाली पक्राउ

अफगानी राष्ट्रपति हमिद कारजाईले विदेशी सुरक्षा गार्डलाई चार महिनाभित्र मुलुक छाड्न उर्दी जारी गरेकै बेला त्यहाँ डेढ सयभन्दा बढी नेपाली पक्राउ परेका छन्। रेस्टुराँ, क्याफे र गैर सुरक्षा संस्थामा कार्यरत नेपाली पक्राउ परेका हुन्।
स्वदेशीलाई रोजगारी दिलाउने र देशको सुरक्षा आफ्नै नागरिकका काँधमा सुम्पने योजनाअनुरूप कारजाईले मंगलबार यस्तो आदेश दिएका थिए।
कारजाईको आदेशभन्दा एक साताअघि नै गैरकानुनी बसोबास गर्दै आएका नेपालीलाई स्थानीय प्रहरीले हिरासतमा लिएको पाकिस्तानस्थित नेपाली दूतावासले जनाएको छ।
भिसा नाघेका, नक्कली भिसामा प्रवेश गरेका १ सय ५० भन्दा बढी नेपाली अफगानिस्तानका विभिन्न इलाकामा पक्राउ परेको बताइएको छ । तीमध्ये अधिकांश रेस्टुरा, क्याफे र गैर सुरक्षा संस्थामा कार्यरत रहेका जनाइएको छ ।
अफगानिस्तानमा कार्यरत नेपालीबाटै खबर आएकाले स्थानीय रेडक्रसको सहयोगमा उद्धार पहल भइरहेको पनि जनाइएको छ ।
राष्ट्रपति कारजाईले आदेश दिनुअघि नै गैरकानुनी रूपमा बस्दै आएका विदेशी कामदारलाई स्थानीय प्रहरीले निगरानी र धरपकड सुरु गरेको थियो।
अफगानिस्तानका सुरक्षा शिविरमा युगान्डा र नेपाली कामदार बढी छन्। त्यहाँ १५ देखि २० हजार नेपाली कार्यरत रहेको दूतावासको अनुमान छ।
त्यसमध्ये धेरैजसो तालिबानविरुद्ध लडिरहेको अमेरिकी नेतृत्वको नेटोका आधार शिविर र ती देशका कूटनीतिक नियोगमा कार्यरत छन्।
उनीहरू पहरा दिनेदेखि विदेशी फौजका सहयोगी, भान्से, प्राविधिकलगायत हुन्।
पहरा दिनेमा बेलायती, भारतीय र नेपाली सेनाबाट निवृत्त भएका बढी छन्। बाकी राष्ट्रसंघीय नियोग, रेस्टुरा र विमानस्थलमा काम गर्छन्।
वैदेशिक रोजगार विभागको तथ्यांकमा भने हालसम्म ४ सय ४१ नेपालीमात्र रोजगारीका लागि अफगानिस्तान गएका छन्।

एनआरएनद्वारा दक्षिण कोरियामा नेपालघरको निर्माण

दक्षिण कोरियामा नेपालघर निर्माण भएको छ।
एनआरएन कोरियाद्वारा विगत केही वर्षअघिदेखि सुरु गरिएको अवधारणा अनुरुप राजधानी सोलको दोङदेमुनमा नेपालघरको निर्माण गरिएको हो।
रोजगारीका लागि कोरियामा आई बेरोजगार हुनुपरेका वा अन्य विविध समस्याका कारण अलपत्र हुन पुगेका नेपालीको हितका लागि निर्माण गरिएको उक्त नेपालघर गत साउन ३० गते विधिवत् उद्घाटन गरिएको छ।
सो अवसरमा नेपाली राजदूत कमलप्रसाद कोइरालाले सङ्घसंस्थाबीच एकता भई यस किसिमको शुभकार्य भएकामा सन्तोष व्यक्त गर्नुभयो।
छाङसिन् दोङस्थित एक भवनको दोस्रो तल्लालाई भाडामा लिई निर्माण गरिएको सो नेपालघरमा हाल दुई कोठा रहेको छ भने स्नानकक्ष र भान्छा छुट्टै छ। उद्घाटनसँगै हाल केही नेपाली सो घरमा बस्न सुरु गरिसकेका छन्।

आइलाग्नेमाथि जाइलाग्न राप्रपाद्वारा युथ भोलेन्टियर्स गठन

भक्तपुर, भदौ ५- पशुपतिशमशेर अध्यक्ष रहेको राप्रपाले युवा सङ्गठन युथ भोलेन्टियर्स गठन गरेको छ। आइलागेमा जाइलाग्ने र पार्टीको सुरक्षा कवचका रुपमा यो सङ्गठनले काम गर्ने जानकारी राप्रपाका नेता तथा पूर्व मन्त्री बुद्धिमान तामाङले दिएका छन्।

भोलेन्टियर्सको भक्तपुर समिति गठनका क्रममा तामाङले भने- यो सङ्गठन विधिको शासनमा विश्वास गर्छ। विशुद्ध सामाजिक काममा संलग्न रहन्छ । तर कसैले पार्टीमाथि आइलागेमा भने जाइ पनि लाग्छ।

उनले १५ दिनभित्र यो सङ्गठनलाई देशव्यापी बनाइने जानकारी पनि दिए।

भोलेन्टियर्सको भक्तपुर अध्यक्षमा राजेन्द्र लाखा रहेका छन्। उनको अध्यक्षतामा अहिले ७ सदस्यीय समिति गठन गरिएको छ।
- रोशन शिल्पकार

कांग्रेस नेतामुखी कि विचारमुखी ?

काठमाडौ, भाद्र ५ - अब कांग्रेसको सभापति को बन्ला ? महामन्त्रीमा कसले जित्ला ? केन्द्रीय कार्यसमितिमा कस्ता अनुहार आउलान् ? युवाहरूको प्रतिनिधित्व कुन रूपमा होला ?  कांग्रेसको १२ औं महाधिवेशनको मुखमा यस्तै थुप्रै प्रश्न सुनिन्छन् ।अझ सभापति पदका दाबेदार मानिएका सुशील कोइराला र शेरबहादुर देउवा आ-आफ्नो 'प्यानल' खडा गर्न र मत संख्याको जोडघटाउ गर्नमा तल्लिन छन् । तर कांग्रेसले लिने नीति र कार्यक्रमबारे कतै छलफल हुन्छ, न कसैले चासो राख्छन्, न त नेताहरू स्वयं गम्भीर छन् । महाधिवेशनमा प्रस्तुत हुने नीति र कार्यक्रम तयार गर्न वरिष्ठ नेता देउवाको संयोजकत्वमा समिति क्रियाशील छ । कांग्रेसका कतिपय नेता यसपालिको महाधिवेशनबाट पार्टी समावेशी भएको र ठूलो सपना बोकेर राजनीतिमा आएका युवाहरूको बाहुल्य बढेकाले वैचारिक पाटोमा आमूल परिवर्तन नभए पार्टी झनै संकटमा पर्ने चिन्ता पोख्छन् ।कांग्रेस केन्द्रीय सदस्य महेश आचार्य महाधिवेशनपछि आउने नेतृत्व भनेको परम्परागत रूपमा एउटा व्यक्ति हारेर अर्को व्यक्ति स्थापित हुने यान्त्रिक प्रक्रिया मात्रै नभई नेतृत्वको कार्यशैली, निर्णय प्रक्रियामा सामूहिक छलफल, जिम्मेवारी बाँडफाँड, केन्द्रीय तहमा समावेशी र समग्र पार्टीको संरचना जोडिने भएकाले नेतृत्व चयन महत्त्वपूर्ण भाग रहेको बताउँछन् ।'पार्टीको गाउँ, नगर र जिल्ला अधिवेशनमा विचारको पक्ष आउन सकेन । अब पार्टीभित्र आन्तरिक छलफल सुरु भएको छ । भ्रातृसंस्था र शुभेच्छुक संस्थाहरूबीच अन्तक्रिर्या गर्दैछौं,' नीति तथा कार्यक्रम तय गर्ने समितिका सदस्यसमेत रहेका आचार्यले भने, 'आर्थिक र सामाजिक आन्दोलनको भावनालाई कांग्रेसले नीतिगत रूपमा सम्बोधन गर्छ ।'नेतृत्वको होडमा गाउँ तहसम्म कोइराला वा देउवा पक्षमा विभाजित नेताहरू आफ्नो खेमाकालाई जिताउन घुँडा धसेर लागे । केन्द्रीय सदस्य पूर्णबहादुर खड्का लोकतान्त्रिक पार्टीमा कसैलाई समर्थन गर्नु स्वाभाविक रहे पनि केन्द्रीय  नेताहरू नै हराउने र जिताउने खेलमा लाग्नु विकृति भएको स्वीकार्छन् । यति हुँदाहुँदै पनि आन्तरिक लोकतन्त्रको हिसाबले अहिलेसम्म नभएको अभ्यास सुरु भएको उनको तर्क छ ।पार्टीको वैचारिक लाइन के हुन सक्छ त ? खड्काका अनुसार आर्थिक, राजनीतिक दृष्टिकोण, संघीयताको संरचना, शासकीय स्वरूप, संविधानमा कांग्रेसको खाका, जनजातिका माग, मधेसी मुद्दा महाधिवेशनको मुख्य एजेन्डा र विचारको मुख्य केन्द्र बन्ने छ । आचार्यले भने अन्य दलको तुलनामा सामाजिक सुधारको अभियानमा कांग्रेसले नेतृत्व लिने गरी कार्यक्रम ल्याउने दाबी गरे । 'शिक्षा, खाद्य सुरक्षा, आवास, रोजगारीका विषयलाई संवैधानिक अधिकारको रूपमा स्थापित गर्न कांग्रेसले नेतृत्व गर्छ,' उनले भने, 'शान्ति प्रक्रिया र संविधान निर्माणमा पनि कांग्रेसको धारणा स्पष्ट हुन्छ ।'युवा नेता गगन थापाले गाउँदेखि जिल्लासम्मको अधिवेशनमा युवाहरूको प्रवेश हुनु संगठनको हिसाबले सकारात्मक भए पनि वैचारिक दृष्टिकोणले प्रशिक्षित बनाउन ठूलो चुनौती थपिएको बताए ।